असोज २ गते बालुवाटारस्थित निलम्बित प्रधानन्यायाधीश चोलेन्द्र समशेर जबराको सरकारी निवासको गेट नजिकै एक युवती पदार्पण भइन्।

सेतो मास्कले करिब आधा अनुहार छोपेकी उनले आफू चोलेन्द्र शमशेर जबराकी छोरी सुनिधि राणा भएको दाबी गरिन् र आफ्नो बुबालाई नजरबन्दमा राखिएको भन्दै बेदना सुनाइन्। मिडिया नराम्ररी झुक्किए। (हेर्नुहोस् तलको तस्बिर)

भोलिपल्ट थाहा भयो, मिडियालाई गुमराहमा पार्ने उनी चोलेन्द्र छोरी नभएर नक्कली रहिछन्। उनी दैलेखकी मीना जोशी रहिछन्, जसले काठमाडौंका एकजना राणा थरका युवासँग बिहे गरेपछि बल्ल जबरा परिवारकी बुहारी बन्न पुगेकी रहिछन्।

स्रोतका अनुसार बालकोटमा पुगेर केपी ओलीसँग फोटो खिचाई एमालेमा प्रवेश गर्ने उनै मीना राणा असोज २ गते बालुवाटारमा चोलेन्द्रकी नक्कली छोरी बनेको राष्ट्रिय अनुसन्धान विभागका कर्मचारीले पत्ता लगाएका छन्।